اجرت لیکر تعویذ دینا :
اگر تعویذ پر اجرت لی جائے تو ایسے تعویذات مسجد میں بیٹھ کر لکھنا جائز نہیں ،اسی طرح اگر اپنے ذاتی کام کے لیے کوئی عمل یا وظیفہ پڑھاجائے اور وہ عملیات دنیا کے واسطے ہوں تو چونکہ یہ باعث ثواب نہیں ہوتے ۔اس لیے ایسے عملیات بھی مسجد میں بیٹھ کر نہیں کرنے چاہئیں !
” رجل یبیع التعویذ فی المسجد الجامع ویکتب فی التعویذ التورۃ ولانجیل والفرقان ویاخذ علیہ المال ویقول ادفع الی الھدایۃ لا یحل لہ ذلک ۔ ” ( ہندیہ :5/321)
مسجد میں دینی تعلیم :
مسجد میں تنخواہ لے کر تعلیم دینے کی تین صورتیں ہیں:
1۔ مدرسہ میں تعلیم دینے کے لیے وافر جگہ موجود ہو ۔جگہ کی تنگی کا مسئلہ نہ ہو۔اس صورت میں مسجد میں تنخواہ کے ساتھ تعلیم دینا جائز نہیں۔
2۔مدرسہ میں جگہ تنگ پڑرہی ہو ۔اس صورت میں ضرورت کی بنا پر تنخواہ لے کر مسجد میں تعلیم دینا جائز ہے ۔
3۔ تنخواہ دار مدرس اس مسجد کا خطیب ،امام یا مؤذن ہو تو وہ بھی مسجد میں تعلیم دے سکتا ہے ۔
جائز صورتوں میں اس بات کا لحاظ ضروری ہے کہ طلبا سمجھ دار ہوں ۔ مسجد کے تقدس اور صفائی کا خیال رکھیں اور مسجد میں شور شرابا نہ کریں ۔
“وان کسان بالاجرۃ بکرہ الا ان یقع لھما الضرورۃ ۔ ( ہندیہ :5/321)
کم عمر بچوں کو مسجد میں لانا :
جو بچے اتنے چھوٹے ہوں کہ عموما ً اس عمر کے بچے مسجد میں پیشاب پاخانہ کردیتے ہیں اور مسجد کے تقدس کو ملحوظ نہ رکھ سکتے ہوں تو ان کو مسجد میں داخل کرنا بھی ممنوع اور گناہ ہے ۔ا رشاد نبوی ہے : ” اپنی مسجدوں کو پاگلوں اور چھوٹے بچوں سے دور رکھے ۔” (ا لترغیب )
مسجد میں مال حرام :
مسجد کے آداب میں سے ایک یہ بھی ہے کہ مسجد میں مال حرام ہر گز نہ لگایا جائے ! مال حرام چاہے رقم کی صورت میں ہو ،چاہے ملبے اور زمین کی صورت میں مسجد کو اس سے معاف رکھاجائے ۔ مسجد میں مال حرام لگانا مسجد کی سخت بے ادبی ہے ۔
“لان اللہ تعالیٰ لا یقبل الا الطیب فیکرہ تلویث بیتہ بمالایقبلہ ” ( شامی :1/ 520)
مسجد میں غیر مسلم کا چندہ : غیر مسلم مسجد میں چندہ دینے کو ثواب سمجھے تو اس کا چندہ لینا درست ہے ،اس کا چندہ مال حرام نہیں،لیکن اگر اس کے مذہبی محفلوں میں شرکت کرنا پڑے گی یا ان کے مذہبی کاموں میں چندہ دینا پڑے گا تو ایسی صورتوں میں غیر مسلم کا چندہ لینے سے بچنا چاہیے ۔
گمشدہ چیز کا اعلان :
مسجد کے اندر کوئی چیز پڑی ہوئی ملی یا کوئی چیز مسجد میں گم ہوگئی تو اس کا اعلان ،مسجد میں کرنا علماء کی اکثریت کے نزدیک جائز ہے ۔گمشدہ بچے کا اعلان مسجد میں کرنے کو بھی اکثر علماء انسانی جان کے پیش نظر جائز کہتے ہیں ۔ان دو صورتوں کے علاوہ کسی اور صورت میں گمشدہ چیز کا اعلان مسجد میں کرنا سخت گناہ ہے ۔ حدیث میں ایسے شخص کو بددعا دی گئی ہے جو مسجد میں گمشدہ چیز کا اعلان کرے ۔
من سمع رجلا ینشد ضالۃ فی المسجد فلیقل لاردھا اللہ علیک گفان المساجد لم تبن لھذا۔
( مسلم ،ابوداؤد،ابن ماجہ ، کذا فی الترغیب :1/126)
ترجمہ : جو کوئی مسجد میں کسی کو گمشدہ چیز کا اعلان کرتے دیکھے تو اس کو چاہیے کہ وہ یوں اس کو بددعا دے :
“اللہ تجھے اپنی چیز واپس نہ کرے ۔ ” کیونکہ مسجد ایسے کاموں کے لیے نہیں بنائی گئیں۔
بلند آواز سے ذکر تلاوت :
نماز کے اوقات میں قرآن کی تلاوت اور ذکر واذکار بلند آواز سے کرنا جائز نہیں ۔ “الا ان یشرق جھرھم علی نائم او مصل اوقاری “
(شامی :1/525)
وقف کا غلط استعمال : مسجد اور مسجد کی تمام اشیاء مثلا ً : پانی ،پنکھے ، گھڑٰ ،قالین، لوٹا، نل، لاؤذ اسپیکر ، غرض یہ سب وقف ہوتی ہیں ، مسجد کے قرآن بھی وقف ہوتے ہیں ۔ان میں سے کسی بھی چیز کا ضرورت سے زائد اور غلط استعمال شرعا درست نہیں ان اشیاء کو احتیاط سے استعمال کرنا لازم ہے۔مسجد کے پانی اور بجلی کا غیر معروف طریقے سے استعمال منع ہے ۔ مسجد کا قرآن دوسری جگہ ، مدرسہ یا گھر لے جانا درست نہیں ۔ان سب باتوں کا لحاظ رکھنا ایک مسلمان کے لیے ضروری ہے ۔
مسجد کا لاؤذ اسپیکر : مسجد کا لاؤڈ اسپیکر ، مسجد سے باہر لے جانا شرعا درست نہیں، ہاں ! اجرت طے کر کے جائز کام میں استعمال کے لیے دینے کی گنجائش ہے ۔اسی طرح مسجد کے لاؤڈ اسپیکر سے بدعات اور گناہ کے کاموں کی دعوت دینا اور خالص دنیاوی امور سے متعلق اعلانات بھی منع ہیں ۔
اذان کے بعد مسجد سے نکلنا :
اگر آپ اذان کے وقت مسجد میں ہوں اور آپ دوسری مسجد کے نہ مؤذن ہیں،نہ امام ہیں تو تو آپ کے لیے مسجد سے نکلنا ایک صورت میں جائز ہھے اور وہ یہ کہ آپ کا واپس آنے کا ارادہ ہو اگر واپس آنے کا ارادہ نہیں تو مسجد سے نکلنا درست نہیں۔
حدیث شریف میں ہے : ” جو شخص مسجد میں ہو اور اذان ہوجائے پھر وہ بغیر کسی ضرورت کے مسجد سے چلا جائے اور واپس آنے کا ارادہ بھی نہ رکھتا ہو تو منافق ہے ۔” (ابن ماجہ )
مسجد میں نماز جنازہ :
مسجد میں جنازہ کی نماز درست نہیں،نماز جنازہ مسجد سے باہر ہونا ضروری ہے۔ اگر جنازہ گاہ کے لیے کوئی جگہ نہ ہو اور نماز جنازہ پڑھنے کی یہ صورت اختیار کی جائے کہ جنازہ ،امام اور کچھ مقتدی مسجد سے باہر ہوں اور بقیہ لوگ مسجد میں ہوں تو اس کی گنجائش ہے۔
مسجدمیں چندہ یا بھیک مانگنا:
مسجد میں مدارس اور دینی رفاء عامہ کے کاموں کے لیے چندہ کرنا شرعی حدود کی رعایت کرتے ہوئے جائز ہے۔ ذاتیی ضرورت کے لیے کسی کا بھیک مانگنا جائز نہیں۔اس لیے مسجد میں بھیک مانگنے والوں کو اس سے منع کرنا چاہیے، کوئی واقعی ضرورت مند ہو تو اس کو یہ ترغیب دینی چاہیے کہ مسجد میں اس کا اعلان نہ کرے بلکہ مسجد سے باہر دروازے پر بیٹھ جائے ۔
مسجد میں مانگنے والے کو بھیک دینا : بھیک مانگنے والا اگر گردنیں پھلانگ کر جائے تو ایسے بھکاری کو کچھ دینا بھی حرام ہے ۔
“فان کان یموبین یدی المصلین ویتخطفی وقاب الناس یکرہ لانہ اعانہ علی اذی الناس۔ ” ( شامی :1/523،9/687 طبع جدید رشیدیہ )
مسجد میں سونا : مسجد میں درج ذیل لوگ سو سکتے ہیں :
1۔معتکف
2۔مسافر
تبلیغی جماعت کے افراد
4۔ مدرسہ کے طلبہ
(جبکہ آداب کا خیال رکھے جائے )
ان کے علاوہ کسی اور کے مسجد میں سونے کی عادت بنالینا درست نہیں۔ مسجد نماز کی جگہ ہے ۔ سونے اور آرام کرنے کی جگہ نہیں ،اگر مجبوری کے عالم میں اتفاقا کبھی مسجد میں سونے کی نوبت پیش آجائے تو مسجد کی شرعی حدود سے باہر آرام کرنا چاہیے ، مسجد کی شرعی حدود میں سونے سے حتی الامکان گریز کرنا چاہیے ۔
مسجد میں گندگی پھیلانا :
مسجد میں کچرا پھیلانا، چھالیہ ، اکغذ وغیرہ پھینکنا منع ہے ۔ اس سے بچنا چاہیے ۔ حدیث شریف میں ہے : ” مسجد میں تھوکنا گناہ ہے اور اس کا کفارہ تھوک کو دفن کرنا ہے “۔ (بخاری )
ہر مسلمان کو چاہیے کہ وہ مسجد میں کوئی ایسی چیز نہ ڈالے جس سے مسجد میں گندگی پھیلے ۔ اور اگر دیکھ لے تو اسے فورا ً صاف کرنے ،
معتکف حضرات اور طلبہ کرام کو اس بیماری میں زیادہ مبتلا دیکھا گیا ہے ۔ذمہ دار حضرات کو چاہیے کہ وہ اس تلافی کی بھر پور کوشش کریں !
” عیکرہ التوضوء فی المسجد ، کالبذق والمخط لما فیہ من الاستخفاف ” ( بحر :5/420)
مسجد کو گزرگاہ نہ بنائیں !
مسجد ،عبادت گاہ ہے ، اس کودنیوی ضرورتوں کے لیے استعمال کرنا جائز نہیں۔ اسی وجہ سے مسجد کو گزرگاہ بنانا بھی جائز نہیں۔ اگر مسجد سے کسی ضرورت کی جگہ کا راستہ جاتا ہو تو مسجد میں کچھ دیر ٹحہر کر ذکر وعبادت کیے بغٰر جانا گناہ ہے ۔ ضرورت کے مواقع پر ایسی جگہ سے گزرنا چاہیے جو مسجد کی شرعی حدود میں داخل نہ ہو۔
حدیث نبوی ﷺ ہے : مسجدوں میں دو کاموں کے علاوہ کسی اور کام کے لیے آنا جانا مت رکھو۔ 1۔ ذکر کے لیے 2 نماز کے لیے
(طبرانی کذا فی الترغیب :1/127)
مسجد کے سامنے کچرا :
اسی طرح مسلمانوں کے معاشرے میں،مسجد کے سامنے کچرا پھینکنا نہایت ہی معیوب اور قبیح حرکت ہے۔اللہ جل شانہ سب مسلمانوں کو اس گناہ سے بچنے کی توفیق عطا فرمائے ۔ (آمین )
جمعہ کے دن خوشبو کی دھونی : مسجد کے آداب میں سے ایک یہ بھی ہے کہ وقتا فوقتا، خصوصاً جمعہ کے دن مسجد کو خوشبو کی دھونی دی جائے ۔
حدیث مبارکہ میں ہے : “جمعہ کے دن مسجدوں کو خوشبو کی دھونی دی جائے ۔
حدیث مبارکہ میں ہے : جمعہ کے دن مسجدوں کو خوشبو کی دھونی دیا کرو !” ( ابن ماجہ )
مسجد سے نکلتے وقت :
*مسجد سے نکلتے وقت الٹا پاؤں پہلےنکالیں پھر سیدھا پاؤں۔
* پھر یہ دعا پڑھیں :
” بسم اللہ والصلوۃ والسلام ولی رسول اللہ اللھم انی اسئلک من فضلک “
