سوال: مولٹی فوم کا گدا ناپاک ہوجائے (بچہ پیشاب کردے )تو اس کو پاک کرنے کاکیا طریقہ ہے ؟
سائل : عمران اکمل
بسم اللہ الرحمن الرحیم
الجواب حامدا ومصلیا
واضح رہے کہ بچہ گدے پر پیشاب کردے تواس کی متعدد صورتیں ہیں:
اگر نجاست(پیشاب) گدے میں سرایت نہ کرے بلکہ اوپر چادر تک ہی محدود رہے تو اس چادر کو پانی سے تین مرتبہ دھوکر ہر مرتبہ نچوڑا جائے ،اس طرح کرنے سے چادر پاک ہوجائے گی ۔
۔۔۔نجاست گدے میں سرایت کرگئی ہو اور اس سے پانی نچڑتا (نکلتا) ہو تو اس کو پاک کرنے طریقہ یہ ہے کہ نجاست کی جگہ پانی ڈالا جائے اور اتنی دیر چھوڑ دیا جائے جس میں پانی ٹپکنا بند ہو جائے،پھر دوسری ،تیسری مرتبہ بھی یہی عمل کرنے سے وہ گدا پاک ہوجائے گا۔
البتہ مذکورہ دونوں صورتوں میں اگر پائپ یا نل وغیرہ کے ذریعہ ایک ہی مرتبہ مسلسل اتنا پانی بہایا جائے جس سے پاکی کا غالب گمان ہوجائے تب بھی کپڑا اور گدا پاک ہوجائے گا۔
اگر گدا موٹا ہوکہ اس میں سے پانی نکالا نہیں جاسکتا یا گدا خراب ہونے کا اندیشہ ہےتو گدا گیلا کپڑا پھیردینے سے پاک نہ ہوگا۔اس کی پاکی کی کوئی صورت باوجود تلاش کے نہ مل سکی۔لیکن خشک ہوجانے کے بعد اس کا عام استعمال بیٹھنا لیٹنا وغیرہ جائز ہے ۔ البتہ اس پر بیٹھ کر نماز کی ادائیگی درست نہیں ہوگی ۔
الفتاوى الهندية (1/ 42)
وما لا ينعصر يطهر بالغسل ثلاث مرات والتجفيف في كل مرة؛ لأن للتجفيف أثرا في استخراج النجاسة وحد التجفيف أن يخليه حتى ينقطع التقاطر ولا يشترط فيه اليبس۔
بدائع الصنائع في ترتيب الشرائع (1/ 85)
لأن المحل إذا تشرب فيه النجس، وأنه لا يحتمل العصر، لا يطهر عند محمد أبدا، وعند أبي يوسف ينقع في الماء ثلاث مرات، ويجفف في كل مرة، إلا أن معظم النجاسة قد زال، فجعل القليل عفوا في حق جواز الصلاة للضرورة، لا أن يطهر المحل حقيقة۔
الدر المختار وحاشية ابن عابدين (رد المحتار) (1/ 332)
(و) قدر (بتثليث جفاف) أي: انقطاع تقاطر (في غيره) أي: غير منعصر مما يتشرب النجاسة (قوله: أي: انقطاع تقاطر)۔وفي التتارخانية: حد التجفيف أن يصير بحال لا تبتل منه اليد، ولا يشترط صيرورته يابسا جدا.
الدر المختار وحاشية ابن عابدين (رد المحتار) (1/ 332)
فالمذكور في المحيط أنه إذا أجرى عليه الماء إلى أن يتوهم زوالها طهر؛ لأن إجراء الماء يقوم مقام العصر۔
الدر المختار وحاشية ابن عابدين (رد المحتار) (1/ 345)
نام أو مشى على نجاسة، إن ظهر عينها تنجس وإلا لا. (قوله: نام) أي: فعرق، وقوله: أو مشى: أي: وقدمه مبتلة. (قوله: على نجاسة) أي: يابسة لما في متن الملتقى لو وضع ثوبا رطبا على ما طين بطين نجس جاف لا ينجس، قال الشارح: لأن بالجفاف تنجذب رطوبة الثوب من غير عكس بخلاف ما إذا كان الطين رطبا. اهـ. (قوله: إن ظهر عينها) المراد بالعين ما يشمل الأثر؛ لأنه دليل على وجودها لو عبر به كما في نور الإيضاح لكان أولى. (قوله: تنجس) أي: فيعتبر فيه القدر المانع كما مر في محله.
احسن الفتاوی میں ہے :2/92
”۔۔قالین تین دفعہ دھونے سے پاک ہوجائے گا اس طرح کہ ہر مرتبہ تقاطر موقوف ہوجائےاگر نچوڑنا دشوار ہو ،اوراگرنچوڑنا دشوار نہ ہو تو تین بار نچوڑنا بھی ضروری ہے ،یہ تفصیل اس وقت ہے جب کہ کسی برتن یا چھوٹے حوض میں ڈال کر دھویا جائے ۔اگراوپر سے پانی ڈالا یا بہتے پانی میں ڈالدیا تو نہ تثلیث شرط ہے اور نہ عصر ، بلکہ یوں اندازہ لگایا جائے کہ اگر برتن میں پانی بھر کر اس میں کپڑا ڈالا جاتا تو جتنے پانی میں کپڑا ڈوب جاتا اس سے تین گناہ پانی بہادینے سے کپڑا پاک ہوجائے گا “۔
نجم الفتاوی میں ہے:۲/۱۴۸
قالین چونکہ ایسی چیز ہے جو کہ نجاست کے اثرات کو جذب کرلیتی ہے اور اس کو عام طور پر نچوڑنا بھی ممکن نہیں ہوتا اس لیے یہ گیلا کپڑا پھیر دینے سے پاک نہ ہوگا بلکہ اس کے پاک کرنے کا طریقہ یہ ہے کہ اتنے وقفہ وقفہ سےتین مرتبہ اسے اس طرح دھویا جائے گا کہ ہر مرتبہ اس سے قطرے گرنا بند ہوجائیں اور تین مرتبہ جب مذکورہ طریقہ سے دھولیا جائے گا تو پھر وہ پاک ہوجائے گا۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
واللہ سبحانہ وتعالی اعلم
محمد رفیق غفرلہ ولوالدیہ
دارالافتاء نور محمد ریسرچ سینٹر
دھوراجی کراچی
06/ ربیع الثانی/1442
24/نومبر/ 2020
