لو میرج کرنے کیسا ہے

فتویٰ نمبر:583

سوال: لو میرج کرناکیساہے ؟

جواب:سب سے پہلے یہ بات پیشِ نظر رہے کہ نکاح ،زندگی کا ایک ایسا اہم معاملہ ہے جس کے انسانی زندگی پر دُوررَس اثرات مرتب ہوتے ہیں ،اس سلسلے میں شریعت کا مزاج یہ کہ ہر اہم معاملہ کو والدین کی سرپرستی میں انجام دیا جائے اور حتی الوسع اُ ن کی مرضی کا خیال رکھا جائے ، بلا وجہ ا ُن کی مرضی کے خلاف کرنا شرعاً مناسب نہیں ہےخصوصاً جبکہ والدین کو عملی تجربہ بھی ہوتا ہے ،تاہم والدین کو بھی چاہیے کہ وہ بھی اپنی اولاد کی جائز ضرورت اور معتبرخواہش کی حتی المقدور رعایت کریں بالخصوص اولاد جہاں رشتہ کرنا چاہ رہی ہے وہاں اگر والدین کی خاندانی وجاہت ،عزت وشرافت اور دینی اقدار متاثر نہ ہو تو والدین کو اولاد کی خواہش کو ٹھکرانا نہیں چاہیے،بلکہ رشتہ کا معاملہ باہمی صلاح و مشورے سے اور افہام و تفہیم سے حل کرنے کی کوشش کریں،بغیر کسی معقول وجہ ایک دوسرے کی بات کو رد نہ کریں اور نہ ہی لڑکے کی مرضی اور پسند کے خلاف اس کو مجبور کریں،اگر والدین پھر بھی راضی نہ ہوں اور جہاں والدین رشتہ کرنا چاہتے ہوں اس کے بارے میں اگر بالغ اولاد کوظنِ غالب ہو کہ وہاں اس کا نباہ نہ ہو سکے گا اور زندگی خوشگوار بسر نہ ہوسکے گی تو اولاد کو چاہیے کہ اولاً نرمی اور خوش اُسلوبی کےساتھ والدین کو رضامند کرنے کی ہرممکن کوشش کرے اور والدین کی رضا مندی سے شادی کرے،اگر باوجود کوشش کے والدین رضا مند نہ ہوں تو بالغ اولاد کو اپنے والدین کی بات نہ ماننے کی گنجائش ہے اور وہ اِس انکار کی وجہ سے گناہ گار بھی نہیں ہوں گی ،البتہ اس کے بعد بھی والدین کے ساتھ حسنِ سلوک اوران کی خدمت باعثِ سعادت ہےاِ س میں کسی قسم کی کوتاہی نہیں کرنی چاہیے۔