مشت زنی پر وعید

سوال: انتہائی طلب کی صورت میں زنا سے بچنے کی خاطر مشت زنی  جائز ہے یا نہیں ؟

الجواب حامدًا ومصلّياً

كئی احادیث میں اس فعل ِ بد (مشت زنی (Musterbation)،ہینڈ پریکٹس) پر وعیدیں وارد ہوئی ہیں، ایک حدیث میں رسول اللہ صلی اللہ علیہ وسلم نے فرمایا :سات لوگ ایسے ہیں جن سے اللہ تعالی ٰ قیامت کے دن نہ گفتگو فرمائیں گے اور نہ ان کی طرف نظر ِ کرم فرمائیں گے ۔۔۔۔اُن میں سے ایک وہ شخص ہے جو اپنے ہاتھ سے نکاح کرتا ہے (یعنی مشت زنی کرتا ہے )، اور ایک حدیث میں ارشاد فرمایاگیا ہے کہ اپنے ہاتھ سے نکاح کرنے والا قیامت کے دن ایسی حالت میں آئے گا کہ اُس کے ہاتھ حاملہ ہوں گے ۔ اوراس کی حرمت قرآن کریم سے ثابت ہے، چنانچہ قرآن کریم میں اللہ تعالی کا ارشاد ہے:

{وَالَّذِينَ هُمْ لِفُرُوجِهِمْ حَافِظُونَ (5) إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ (6) فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ (7) } [المؤمنون: 5 – 8]
ترجمہ :‘‘اور جو اپنی شرم گاہوں کی(اور سب سے ) حفاطت کرتے ہیں(۵)سوائے اپنی بیویوں اور ان کنیزوں کے جو ان کی ملکیت میں آچکی ہوں ،کیونکہ ایسے لوگ قابل ملامت نہیں ہیں(۶)ہاں جو اسکے علاوہ کوئی طریقہ اختیار کرنا چاہےتو ایسے لوگ حد سےگزرے ہوئے ہیں’’
یعنی بیوی اور شرعی کنیز کے سوا کسی اور طریقے سے اپنی جنسی خواہش پوری کرنا حرام ہے۔ (آسان ترجمہ قرآن)

معارف القرآن میں حضرت مفتی محمد شفیع صاحب رحمہ اللہ اس آیت کے تحت فرماتے ہیں:
‘‘جمہور کے نزدیک استمناء بالید یعنی اپنے ہاتھ سے منی خارج کرلینابھی اس میں داخل ہے’’،یعنی مشت زنی ناجائز اور حرام ہے۔

لہذا اس بناء پر جمہور علماء ِ کرام کے نزدیک لذت حاصل کرنے کے لئے مشت زنی کرنا ناجائز اور گناہ ہے، البتہ اگر کسی غیر شادی شدہ شخص پر یا بیوی سے دور شخص پر شہوت کا اس قدر غلبہ ہو کہ کسی گناہ میں مبتلا ہونے کا شدید خطرہ ہو تو درج ذیل صورتوں پر عمل کرے ۔

(۱)غلط ماحول اور خیالات سے بچنے کی حتی المقدور کوشش کرے ،اگر شادی شدہ ہے اور بیوی سے کہیں دور ہے تو بیوی کے پاس آنے کی فوری کوئی صورت اختیار کرے ،اور اگر رخصتی نہیں ہوئی تو رخصتی کاانتظام کرے ، لیکن واضح رہے کہ نکاح کے بعد رخصتی سے پہلے بیوی کے ساتھ تعلق رکھنا شرعا ً جائز ہے۔

(۲) روزہ رکھے ،کیونکہ روزہ رکھنے سے شہوت مغلوب ہوتی ہے ۔

(۳)تسکین بخش دوائی اور غذا استعمال کرے ،جب ان مذکورہ صورتوں پر عمل کرنے سے بھی شہوت مغلوب نہ ہو، اوربیوی کے پاس آنے یا رخصتی کا فوری کوئی انتظام بھی نہ ہورہا ہو،اور زنا میں مبتلا ہونے کا قوی اندیشہ ہو، تو اگر ایسا شخص زنا سے بچنے کی غرض سے مشت زنی کرے تو انشاء اللہ تعالیٰ توقع ہے کہ ا س پر اس کا کوئی وبال نہ ہوگا ،کیونکہ اس کا مقصد زنا سے بچنا ہے، نہ کہ لذت حاصل کرنا ،لیکن اس کے باوجود اللہ تعالیٰ سے توبہ واستغفار بھی کرے۔(مأخذہٗ تبویب۷۴؍۱۲۴)