سوال:مجھ پر دو سال کی نمازیں قضا ہیں پوچھنا یہ ہے کہ میں اشراق چاشت اور دیگر نوافل کی جگہ قضا نمازیں پڑھوں یا ساتھ ساتھ یہ نوافل بھی پڑھوں کیا صورت بہتر ہے؟
سائل:حسان احمد
﷽
الجواب حامداومصلیا
قضا نمازیں پڑھنا چونکہ فرض ہے ،اس لیےجتنی جلدی ہو سکے قضا نمازیں ادا کر کے ان کو اپنے ذمہ سے ساقط کریں ،لہذا بہتر یہی ہے کے جو دو سال کی قضانمازیں ہیں ان کو پہلے ادا کریں۔اس حالت کے اندر نفل نماز پڑھنا اور قضا نماز چھوڑ دینا دانشمندی نہیں ہے۔لیکن نفل نمازوں کو بالکل ترک نہ کیا جائے،ان کی کم سے کم والی مقدار ادا کی جائے۔
الدر المختار وحاشية ابن عابدين (رد المحتار) (2/ 66)
“وقضاء الفرض والواجب والسنة فرض وواجب وسنة”
الفتاوى الهندية (1/ 125)
“وفي الحجة الاشتغال بالفوائت أولى وأهم من النوافل إلا السنن المعروفة”
جاری ہے۔۔
فتاوی محمودیه – جلد 11ص351:
“جس شخص کے ذمہ فرض نمازیں قضا باقی ہوں اس کوچاہئے کہ قضا نماز پڑھنے کا اہتمام کرے ایسی حالت میں نوافل کااہتمام کرنا اورقضا کونہ پڑھنا پسندیدہ نہیں، خلاف دانشمندی بھی ہے اگرچہ یہ حکم نہیں لگایاجائے گا کہ نفلیں فاسد ہوگئیں ایسے شخص کوچاہئے کہ را ت اوردن کی نفلیں اشراق،چاشت، اوابین ،تہجد وغیرہ ظہر وعصر کے اوقات میں بجائے ان نفلوں کے قضا نمازیں پڑھا کریں۔اس کو ان اوقات میں نوافل پڑھنے کا بھی انشاء اللہ تعالیٰ اجر وثواب ملے گا۔ فقط واللہ اعلم”
واللہ اعلم بالصواب
کتبہ: حسان احمد عفی عنہ
نور محمد ریسرچ سینٹر
دھورا جی کراچی
1441/5/22
2020/1/18
