میں قرآن پاک پڑھتی ہوں تو روز کے روز آپ علیہ السلام اور کل امت مسلمہ اور خصوصا اپنے مرحومین اور والدین کو ایصال ثواب کر دیتی ہوں۔
اگر کسی نے کہاہو کہ کچھ پارے پڑھ دیں کسی کے ایصال ثواب کے لئے تو میں اپنے پڑھے ہوئے پارے انہیں دے دیتی ہوں۔۔ اور بعد میں دوبارہ اپنے لئے وہ پارے پڑھ لیتی ہوں۔۔
کیاایسا کرنا ٹھیک ہے؟ یا ان کے لئے الگ سے پارے پڑھنے چاہیئں؟
الجواب باسم ملھم الصواب
واضح رہے کہ اہل سنت والجماعت کا عقیدہ ہے کہ اگر کوئی آدمی تمام مسلمان مرحومین کے لیے ایصال ثواب کرتا ہے تو ان تمام مرحومین کو اس کا ثواب پہنچتا ہے، لہذا صورت مسئولہ میں اگر کوئی شخص آپ سے سپارہ پڑھنے کی درخواست کرے تو جو سپارے آپ نے پڑھے ہوئے ہیں، آپ درخواست کرنے والے کو مسئلہ بتا کر ان سپاروں میں دوسرے مرحومین کو شامل کردیں۔ اس صورت میں نئے سپارے پڑھنے کی ضرورت نہیں۔ البتہ اگر ان سپاروں کا ثواب مرحومین کو پہلے ہی بخش دیا ہے تو چونکہ ان کا ثواب ان کو پہنچ چکا ہے، اب نئے سپارے پڑھنے ہوں گے۔
۔۔۔۔۔۔۔۔۔۔۔۔۔۔۔۔۔۔۔۔
حوالہ جات:
1۔عن عبد الله بن عمر قال: قال رسول الله ﷺ من حج عن والدیه بعد وفاتهما کتب له عتقاً من النار، وکان للمحجوج عنهما أجر حجة تامة من غیر أن ینقص من أجور هما شیئاً”.
( شعب الإیمان ، 6/ 204، رقم: 7912)
یعنی حضرت عبداللہ بن عمر رضی اللہ عنہ رسول اللہ صلی اللہ علیہ وسلم کا فرمان نقل کرتے ہیں کہ: جو شخص اپنے والدین کی وفات کے بعد ان کی طرف سے حج کرتا ہے، تو اس کے لیے جہنم سے خلاصی لکھ دی جاتی ہے، اور جن دونوں (والدین) کی طرف سے حج کیا گیا ہے انہیں کامل حج کا ثواب ملتاہے، نہ حج کرنے والے کے اجر میں کوئی کمی کی جاتی ہے اور نہ ہی جن کی طرف سے حج کیا گیا ہے ان کے اجر میں کوئی کمی کی جاتی ہے۔
۔۔۔۔۔۔۔۔۔۔۔۔۔۔
2۔عن أبي هريرة رضي الله عنه : أن النبي صلى الله عليه و سلم قال إذا مات الإنسان انقطععمله إلا من ثلاث صدقة جارية وعلم ينتفع به وولد صالح يدعو له۔ قال أبو عيسى هذا حديث حسن صحيح
سنن الترمذي : (3 / 660)
۔۔۔۔۔۔۔۔۔۔۔۔۔۔۔۔۔
3۔ قال الخطابي: وفیه دلیل علی استحباب تلاوة الکتاب العزیز علی القبور؛ لأنه إذا کان یرجی عن المیت التخفیف بتسبیح الشجر فتلاوة القرآن سورة یٰس يخفف الله عنهم یومئذ“۔
(عمدة القاری، کتاب الوضوء ، باب من الکبائر أن لایستتر من بوله، 2/ 598)
۔۔۔۔۔۔۔۔۔۔۔۔۔
4۔والأصل فیه أن الإنسان له أن یجعل ثواب عمله لغیره صلاةً أو صوماً أو صدقةً أو قراءة قرآن أو ذکراً أو حجاً أو غیر ذلك عند أصحابنا بالکتاب والسنة۔“
( البحرالرائق، کتاب الحج، باب الحج عن الغیر،3/ 59)
۔۔۔۔۔۔۔۔۔۔۔۔۔۔۔
5۔فللإنسان أن یجعل ثواب عمله لغیره عند أهل السنة والجماعة سواء کان المجعول له حیًّا أو میتًا من غیرأن ینقص من أجره شيء. وأخرج الطبراني والبیهقي في الشعب عن ابن عمر قال: قال رسول الله ﷺ: إذا تصدق أحدکم بصدقة تطوعاً فلیجعلها عن أبو یه؛ فیکون لهما أجرها ولاینقص من أجره شيء”.
(حاشیة الطحطاوي علی مراقي الفلاح، کتاب الصلاة، باب أحکام الجنائز، فصل في زیارة القبور )
۔۔۔۔۔۔۔۔۔۔۔۔۔۔
والله تعالى أعلم بالصواب
27 شوال 1444ھ
17 مئی 2023ء
